Sorkar thuchhuah tarlan danin, Home Minister in Bairabi a Inner Line Permit (ILP) Check Gate, Police Station leh Rail Station-te a hmunah enfiahna a neih zawh hian Bairabi Sub-Divisional Office-ah khawtlang hruaitute, Sawrkar Officials-te leh tlawmngai pawl hruaitute nen inkawmhona neih a ni a. Home Minster chuan Mizorama Rail kawng thar September ni 13 a hawn tura ruahman chu hmasawnna ropui tak a nih rualin; he hmasawnna hian State dang atangin mikhual tam zawk rawn luhna kalkawng a hawn zauh sak dawn a, chumi piah lamah a let zawnga ruihhlo lo luhna kawng pakhat a ni thei a, chumi avang chuan dan hnuaiah Mizorama rawn lutte felfai taka chhinchhiah a an rawn luh theih nan ILP pekchhuah kawngah fimkhur zawka hma lak a tul thu sawiin, heng thil hrang hrangte hi a hmuna chengte nen sawihona neih sawrkar in tha atih avanga vawiin hun chu ruahman a ni, a ti.

He inkawmhona ah hian Bairabi khawtlang hruaitute chuan tuna Bairabi ILP Check Gate a hman mek chu COVID19 hrilen laia Screening Point-a hman thin a nih thu leh temporary ILP Check Gate-atan a hman chhunzawm a nih dante an sawilang a. ILP Check Gate hi Sawrkar hnuaia dan anga changtlung zawka din a nih thuai theih nan hmalak ni se tih te, ILP Check Gate hela Tlawng dung atanga Mizoram rawn lut thin te dan nan Tlawng dunga ILP check Gate awm a tul zia thu te leh Bairabi leh a chhehvel a hnamdang ina awmhmun an lo khuar thin te dap chhuah kawngah sawrkarin chak takin hma la se an duh thu Home Minister hnenah hian an thlen a.

Heng bakah hian State dang atanga dan lova lo lutte leh dan phal loh bungrua lo lut te chak zawka dapchhuah leh ven dan kawng sawi ho a ni bawk.

He hunah hian Vanlalmawia, Home Secretary chuan Mizoram a Rel lo lut tura avanga Sorkar inbuatsaihna hrang hrang te sawiin, Rel Station 5 zinga 4 chu Kolasib district chhung ami a ni tiin, Railway police din chungchang a sorkar ruahmanna hrang hrang te, ILP Counter kalpui a pawimawh dan leh ruahmanna te, hemi chungchangah sensitization neih dan tur ruahmanna siam a nih thu te a sawi lang bawk.

Home Minister hian vawiin hian Bairabi atangin Phaisen leh Vairengte lam panin ramri dinhmun enfiahna a nei chhunzawm dawn a, Kolasib District chhunga Inner Line Permit (ILP) Check Gate awmte tlawhchhuak tura fehchhuak in, he thu buatsaih lai hian Home Minister hian Bairabi Sub-Division a hmalaknate enfiahna a la nei mek a ni.

Home Minister hi Lalfamkima, Deputy Speaker; Advisor to CM pahnih, TBC Lalvenchhunga leh Lalmuanpuia Punte, Home Secretary, Vanlalmawia, Robert C. Lalhmangaiha, DC Kolasib, Lalthangpuii Pulamte, AIG(OPS) , David H. Lalthangliana, SP Kolasib te leh Commandant 1st Battalion IR Mualvum, Central leh Kolasib Sub Hqrs YMA hruaitute leh hruaitu dang ten an tawiawm a ni.